الثلاثاء، 17 مايو 2011

صديقات...و لكن!

مشكلتي اني بصدق كل حاجه و أي حد أو هكذا كنت, متضحكوش لو قلت اني كنت فاكره (سوني) بنت الدكتوره (ستيته حسب الله الحمش) بجد, و إني ساعات كنت بفتكر ان الصور اللي بيحطها الناس على الفيس بوك صورهم بجد, صدقت إن بعض البنات صديقات, و المشكله دي خلتني أتخدع كتير في الناس , مكرهتش حد لأنها مشكلتي أنا اني بصدق.

مكنتش عايزه اتكلم في مدونتي عن أي موضوع شخصي لكن الفضفضه مهمه أحياناً, في مواقف بتعدي في حياة الانسان مبينسهاش مع إنها صغيره لكن عميقه , احدى المواقف دي من صديقة عمري اللي كانت بمثابة أختي و لما ارتبطت بزوجي قطعت علاقتها بي بشكل مفاجئ و غير مبرر , صدمتني, اتجوزت بسرعه قبل فرحي بأيام و معزمتنيش, بكيت كتير علاقتنا اللي كانت قويه اتمنيت تشاركني إختيار فستان الفرح و أتمنيت أكون جنبها في فرحها كان نفسي اشوفها و هي بتلبس الطرحه و كان نفسي تحضني بحب في فرحي.

بابايا كان دائماً يقولي البنت دي هتقطع علاقتها بيكي لما ترتبطي و رغم إني بصدق كل حاجه بس المره دي مصدقتوش, كان شايف إنها عايزه تستحوز عليه و متخليش ليه صحاب و فعلاً هي بعدتني عن كل زميلاتنا الا واحده مخلصه لولاها كنت مصدقتش ان في حاجه إسمها صداقه, الغريب إنها حاولت تاني ترجع علاقتنا بكل قوتها و سامحتها لكن مقدرتش أرجع معاها زي الأول.

الموقف التاني من زميله في العمل كنت مصدقه إنها صديقه لما كنا بنخرج مع بعض و ناكل مع بعض و نشارك هموم بعض, لحد ما بدأت تسوق و كانت بتوصلني في طريقها لأننا جيران, إشتكت مرات قدامي من غلو البنزين...منتبهتش, إتفقت هي و بنات زميلاتنا إنهم يركبوا مع بعض كل يوم بعربيه و لأني كنت من نفس الحي أركب معاهم....صحيح البنات للأسف مش في نفس شهامة الرجال كانوا بينزلوني في طريقهم كتر خيرهم لكن محدش فكر يتعب شويه لمدة دقائق عشان أنزل عند بيتي بدل ما أضطر تاني أركب تاكسي , في حين الولد ممكن يوصل صاحبه المطار عادي جداً و بكل حب...المهم صاحبتنا دي إقترحت إقتراح ظريف إني أركب معاهم بشرط أدفع ثمن الجراج...!

يمكن يكون موقف عادي في نظر البعض لكن بالنسبه لي كان و مازال جرح لأني تعودت أعامل الناس بطريقه معينه و كنت بنتظر منهم نفس الطريقه و عمري ما تخيلت إن الفلوس هتكون شرط لعودتي معاهم, كام جنيه!! أهم من علاقات إنسانيه , طبعاً ساعتها إختفيت ساعة الخروج من العمل كنت بتبخر و مكانش حد يشوفني و لا كنت عايزه أشوف حد, الغريب بقى إني لما رجعت الشغل و معايا عربيه المره دي و بسوق البنت دي كلمتني من يومين و طلبت مني تروح معايا الشغل لأن العربيه أصبحت مع زوجها, عايزين تعرفوا عملت إيه.....؟ , أنا مش زيهم لما حد بيركب معايا بينزل عند باب بيته معزز مكرم.

ممكن محدش يستغل الفرصه و يقولي أي حاجه و أصدقها :)

هناك 57 تعليقًا:

موناليزا يقول...

أنا كمان للأسف بصدق
وبعتقد أن اللى بيقول حاجة حتى لو فى تعليق مش بس فى مدونة بيبقى قاصدها بمعناها الحرفى مش مجرد رد زيارة أو مجاملة

بعيداً عن هذا أحييكى على أنك اتعلمتى السواقة عايزة أوى أتعلمها بس خايفة مش على نفسى والله لكن على أى حد ممكن ييجى فى طريقى:)

وعلى فكرة توقعت موقفك الأخير وإنك يوم ماتكونى مكانها هتتعاملى بأخلاقك أنتى مش بأخلاقها هى

Unknown يقول...

موناليزا: كنت متوقعه انك بتصدقي على فكره بيبان يعني
موضوع السواقه ده عايز بوست لوحده كتبته فعلاً من فتره و هنشره قريب ان شاء الله.
لو كنت بفكر زيها مكنتش اتجرحت يا منى.
تحياتي ليكي و شكراً على تعليقك الجميل:)

Mona Hekal يقول...

شيرين
انا حبيتك اكتر :)
و كنت عارفة انك هاتقولي بتوصليها لحد البيت لأنك أصيلة مش زي ناس نص كم
ربنا يحميكي و يبعد عنك كل شر

سواح في ملك اللــــــــــــــــــه- يقول...

اولا الف مبروك للعربية
ثانيا البراءة مش عيب
وانك تصدقي مش عيب
العيب دلوقتي في الناس مش فيكي لان الانسان الصادق
نموزج نضيف لم يتلوث باكاذيب الحياة
ودهاليز الخداعات والحيل
فيه مثلين عايز اقولهملك نصيحة من اخ
قديما قالوا ((حرص ولاتخون ))
وقالوا ايضا احذر عدوك مرة واحذر صديقك الف مرة
تحيتي

Kem يقول...

اولا انا ولد فأختلف شوية بس انا اصلا اختلف عن البشر جميعا نيهاهاها
انا فى ناس معينين بصدقهم و يكدبوا و اعذرهم و اصدقهم , فى ناس تانيين بقى لو حلفولى ع المياه تجمد ابدداااا مصدقش ولا كلمة مش لازم يكونوا كانوا كدبوا عليا قبل كده بس كلامهم مبيدخلش دماغى فمبصدقوش , مع ذلك انا مبصدقش الكلام اللى على مزاجى يعنى اما حد بيقولى على انا عملتها حلوة مببقاش وائق اوى انها كويسة ,
مبروك ع العربية
بس فى موضوع انهم يوصلوكى لو خدتيها من ناحية الحساب الانجليزي متزعلش لكن انتى بتقولى انك بتعامليهم بطريقة تخلى الحساب الانجليزى قلة زوق بس عموما تلت اربع الناس مبقاش عندها زوق :)) مع ان الزوق مخرجش من مصر

Ramy يقول...

لا أنا صدمتى الأولى ودتنى المستشفى
فى شبه أنهيار عصبى

هههههههههه

بجد

لأن كنت بثق فى صحابى جداً جداً جداً

بس بعد كده قدرت اتماسك و بقى الموقف أخرج منه و انا معايا المثل الكبير الرهيب

أعرف صاحبك و علم عليه (:

لكن موضوع البنت مع بعض مش جدعان زى الولاد مع بعض ده حقيقى (:

بس مش عارف ليه

فى الأخير

ولا يهمك كل التجارب دى بتتعلمى منها بتقويكى نفسياً جداً بجد

ENG./ELSAYED,PMP يقول...

ملقاش حقنة فيتامين سى

Unknown يقول...

Mona Abo - Elso3od: منى القلوب عند بعضها :)
هقولك زي ما قلت لموناليزا أنا لو كنت بفكر زيها مكنتش زعلت لكن المشكله إن الواحد ساعات بيبقى حساس بزياده.
بتسعديني دائماً بتعليقك يا منى
تحياتي و حبي أختي العزيزه

Unknown يقول...

سواح في ملك الله: شكراً يا خالد الله يبارك فيك, المشكله ان تصديق الناس على طول ممكن يعتبر نوع من السذاجه و بيتعب أوي.
أشكرك على ذوقك و الأمثال الجامده خصوصاً الأخير.
تحياتي الخالصه لك

Unknown يقول...

اغانى الشتاء: في موضوع الندالله و قلة الزوق دي بجد معظم الرجاله مش كده (مع بعض) بحسدكم:) و كوبس انك عارف مين ممكن كلامه ميتصدقش و مين ممكن تعذره يعني مثلاً الاعلام ده أنا مبصدقوش أبداً
الله يبارك فيك ميرسي على ذوقك, أنا ماليش في الحساب الانجليزي ده بالذات لما الموضوع يبقى بين صحاب أو ف أشياء غير ثمينه.
أشكرك على التعليق الجميل و يا رب الذوق ما يخرج من مصر أبداً
تحياتي ليك

Unknown يقول...

Ramy: لأنك انسان عاطفي يا رامي فصدمتك أكيد بتبقى أكبر خصوصاً لما ثقتك في الصديق ده بتبقى كبيره بس تعرف محدش يستاهل الواحد يضيع صحته عشانه مهما كان.
أدينا بنتعلم و يا رب نتعلم بجد
تحياتي الخالصه لك

Unknown يقول...

ENG./ELSAYED,PMP :يا ريت كنت نفعت بيها نفسي :).
نورت

ليلى الصباحى.. lolocat يقول...

السلام عليكم
هههههههه انت رائعة وطفلة بروح ندية

احب الاسنانة اللى تتعامل بمنتهى البراءه والبساطة وتبعد عن التكلف والتصنع
تعاملى مع الناس بدون اى تكلف وكونى على سجيتك ولا يشغلك طبائع البشر فلن ترضى عنك الناس كلها ولن تستطيعى ان تصلى لعقلهم كلهم فمهما تعبتى نفسك بالتفكير فستظل الدنيا بهذا الشكل الغريب


رائع ما خطه قلمك من خواطر حبيبتى وفى انتظار المزيد الذى يقربنا منك اكثر واكثر

دمت بكل خير وسعادة و براءة

تحياتى لك

Unknown يقول...

مش عارف أقولك اي بجد لإني متحطيتش ف موقفك ده قبل كده ، أو جايز لإني فضلت طول عمري من غير صحاب قبل ما اعرف سكة التدوين و يبقالي اصدقاء عليه...
بس عايز اقولك حاجة ، صديقتك الأولي وارد جدا انها فعلا كانت بتحبك و بتعزك خصوصا و إنك بتقولي ان علاقتكم كانت ع المدي الطويل و مفيش حد بيخدع حد ع المدي الطويل ، حتي انا كنت استغرب و اتغاظ اما اسمع أغنية من بتاعة (كنت بتخدع فيا سنين و ليالي) و الهلس اللي انتي عارفاه ده ، و اقعد اقول ف بالي مين ابن الرايقة ده اللي كرس حياته كلها عشان يخدع سيادتك ، حسب ظني ان اللي بيحصل ان طرف من الطرفين بيتغير فجأة لسبب ما ، مش شرط تكوني انتي السبب ممكن تكون حاجة طرأت ف حياتها و قاطعتك بسببها بشكل غير مباشر...
أنا طولت عليكي انا آسف بس انا بقالي كتير مشفتش البلوجات و وحشني جوها أوي :))
حفظك الله دائما...

ابراهيم رزق يقول...

بصى يا شرين
كونى زى ما انتى البساطة و التلقائية و لا تحاولى ان تغيرى من نفسك اللى يغير من نفسه هو التصرف الخاطىء و انا لا ارى فى هذا اى خطأ
اما النظام الانجليزى بين الاصحاب فده ايضا خطأ اللى بين الاصحاب مشاعر و ود و حب و عشرة و كل هذا يتضائل امام الماديات
اما صديقتك اللى كلمتك على موضوع الجراج فهذه ما كتب فيها الجاحظ روايته الشهيرة الب.......لاء
اما موضوع الصدمة فانا فى الغالب باتعامل مع الناس غلى انهم بشر و ليسوا ملائكة و انا ايضا بشر لذلك فانا قادر فى الغالب على التعامل مع سلبيات اصدقائى و فى الغالب اعرفها لذا انا بلا فخر مقرب الى جميع اصدقائى حتى فى اسرارهم الشخصية
تحياتى و تقديرى

فشكووول يقول...

السلام عليكم
تحياتى
ما علهش يا دكتوره .. الدنيا كدا .. لكن احنا لازم نتعامل مع الناس .. ما هو احنا بشر وما كامل الا الله سبحانه وتعالى .. فينا كثير من الاخطاء وساعات كتير من النداله .. لكن برضه حتلاقى كتير من الانسانيه .. يعنى انتى بتتعاملى مع انسان والانسان ناقص .. خدى من كل الناس اللى حلو فيهم واتركى الباقى ..ولازم حتلاقى فى كل انسان نقص ولو عاملتى الناس بنواقصهم يبقى مش حنلاقى حد نتعامل معاه .. كمان البشر فيهم كثير من المتناقضات .. انا مثلا احيانا كثيره اجد نفسى متناقضا مع نفسى ولابد ان نعترف ونرضى بذلك
تحياتى

مصطفى سيف الدين يقول...

الخل الوفي من المستحيلات بس موجود انما صعب تلاقيه
دايما مختفي عن العيون
مواقفك دي تدل على شخصيتك الطيبة المحبة لاصدقائها
تحياتي ليكي وربنا يباركلك في اصدقائك ويحبوكي ويعاملوكي نفس المعاملة الطيبة اللي بيلاقوها منك

دعاء العطار يقول...

فكرتينى بيا (: (:

أنا كمان بقدم حسن النيه فى التعامل مع كل الناس وبتعامل بتلقائيه وبعدين بكتشف انها بسذاجه مش تلقائيه

أقولك ع حاجه بس ماتزعليش

دول ماينفعش تطلقى عليهم لفظ " الصديق " من اساسه

الصديق وع حد علمى وع حد ماعرفت وعاشرت .... هو اللى يحس بيكى من غير ماتتكلمى

يفضلك ع نفسه ويتمنالك الخير

تبقى انتم الاتنين واحد ... اللى يزعلك يزعله واللى يفرحك يخليه مش قادر ينام من السعاده

للأسف قابلتى الناس الغلط

بس فرحانه بيكى جداً وبتصرفك انك مش عاملتيهم نفس المعامله ... لأن انتى غيرهم فكان لازم تصرفك يكون مختلف عنهم

اللى عايزه أقولهولك

انى دايماً بقول ان اكبر نعمه من ربنا عليا هى أصحابى ... عشان كده بقولك ان دول مش صحااااب

ربنا يعوضك خير ويرزقك بأصدقاء بجدد (: (:

Tears يقول...

انت رقيقة اوى

الناس فيها الحلو و الوحش بس انتى ابقى دققى :)

FAW يقول...

شيرين

كل يوم الواحد بيكتشف فيكي صفة حلوة
مش عيب أبدا إنك تبقي بتصدقي كل حاجة , رغم إن ده ساعات بيوقعك في مشاكل بس بيبقي دليل علي صفائك ونقاء قلبك وبحييكي علي كده بجد وصدقيني :)

ألف مبروك علي العربية وتعلم السواقة , موضوع بيبقي صعب قوي علي أي بنت زي ما بشوف :)

علي فكرة حكاية الفلوس أنا معاكي إن الولاد فعلا بيبقوا أجدع شوية , بس عن نفسي أنا وصحابي قبل التخرج كنا بنشارك بعض , عشان كلنا مفلسين :)
إنما دلوقتي ممكن نشارك لو مسافرين مكان بعيد , شرم مثلا , بس ده بيبقي عرف أصلا تحسي إنه حاجة في قاموس الولاد يعني أوتوماتيك لو أنا دافع وإحنا رايحين يدفع صاحبي وإحنا راجعين من غير ما أطلب , بس أكيد أكيد عمرنا ما مسكناها لبعض . .

بحييكي جدا علي أخلاقك المتوقعة وعلي فكرة حاجة متشغليش بالك بيها خالص , أنا برضو من ساعة ما فقدت صديق عزيز علي حاجة أقل من كده وأنا مبقتش مهتم بتوطيد أي علاقة ومبقاش يفرق معايا حد , ومتوقع إن الموضوع ده يزيد كمان بعد ما أتجوز , عادي :)

تحياتي . .

Unknown يقول...

السلام عليكم

أنا مش هعلق على المواقف اللي حصلت لك أختي شيرين.. فأنت كنت بتفضفضي بالدرجة الأولى، يعني المفروض إنك عاوزة اللي يسمعك أكتر...

لكن من باب إتماام الفائدة اسمحي لي أن أطرح عليك كام قاعدة كده (باستخدمهم شخصيا في حياتي عمليا.. يعني مش ناقلهم لك من الكتب :) وخدي منهم اللي ينفعك:
1- مش معنى إن اللي قدامي مختلف عني يعني هو وحش وأنا حلو أو هو خطأ وأنا صواب (فلكل منا نفسيته وطريقته في التفكير).
2- ليس من الصواب تعميم الحكم على طائفة بسبب أفعال بعض منها (كل الولاد كذا، وكل البنات كذا)...!
3- عندما أحاسب الآخرين على أخطائهم معي، أترك في حساباتي مساحة للضعف البشري.

أرجو أن تكون رسائلي وصلت.

دمتِ سالمة نقية سليمة الطوية..
تحياتي.

سندباد يقول...

حسن النية اللي هي فطرة الانسان للاسف الشديد وبفعل الاخرين اصبحت عيب من العيوب زي الطيبة والتسامح والشهامة كل الحاجات الحلوة دي للاسف بقت حاجة وشحة ولازم نتخلي عنها ولازم نبقي ديابة في عالم بقي زي الغابة
بس في الاخر صدقيني لن يصح الا الصحيح والرسول عليه الصلاة والسلام قال عامل الناس بما هم اهل له فان لم يكونوا اهل له فانت اهل له صدق رسول الله صلي الله عليه وسلم او كما قال

rack-yourminds يقول...

المواقف التي تعرضتي لها تدل علي انك انسانه طيبه ولا يحمل قلبك اي ضغينه او حقد
رزقك الله بالصديقه المخلصه

غير معرف يقول...

مساء الغاردينيا
مؤلمة تلك الصدمات في الحياة وحين نعتقد أننا حصلنا على صديق لنجدة من يطعن مشاعرنا ويجرحنا في حين كنا نحتاج إليه ليضمد ذلك الجرح والاصعب حين تفهم طيبتك ووفائك بسذاجة "
؛؛
؛
شيرين
أبقي كما أنتِ اطيب وأرق وأصدق لم أندم يوماً أنني أصدق مشاعر الناس حتى من ينفعل بقلمه في تعليق لدي وربي أصدق وابتسم بسعادة لانني جعلته يبتسم بين سطوري لا تندمي يوماً لانكِ تملكين قلب طيب يصدق وروح راقية تواصل الجميع وكوني أنتِ أنتِ مهما اختلف من حولكِ "
؛؛
؛
شيرين
أتصدقيني لو قلت لكِ والله صدقت كل حرف هنا وشعرت بفخر لانني هنا !
؛؛
؛
لروحك عبق الغاردينيا
كانت هنا
reemaas

zizi يقول...

شيرين باحبك قوي وباحبك بجد ..وتصدقي بالله انا بنتي اللي من لحمي ودمي ..باحس أحياناً كتير إنها بتقع في مواقف زي كده وبابقى نفسي تحكيلي عشان حتى اطبطب عليها ..لكن هي عمرها ما جربت تحكيلي ..تصدقي يابنتي انا نفسي أخدك في حضني واعيط ..اعيط قوي ..وفعلاً انا دلوقتي باكتبلك وانا باعيط..عايزة قوي آخدك في حضني ..شيرين ..الناس يابنتي مش دايماًزي مابنتوقع ..واسمعي كلام بابا في كده ..اللي متربي زيك على قيم حلوة حا يفتكر كل الناس كده زيه ..بس همّ يابنتي مش كده ..ولازم تتعلمي حاجة قريتها زمان ك(علمتني الحياة ان اتوسم في الناس القليل ..فخيرٌلي أن اتوسم القليل وأجد الأكثر ..من أن اتوسم الكثيرُ ..ولا أجد شيئاً)

حبيبتي ..دخلت لأزفُ إليكِ

أني قد إنتهيت..من كتابة الجزء15]ب[ من قصة المعطف ..

وقد نشرتها هذه المرة على مدونتي البقلب الأخضراني ,,والدعوة عامة لكِ ولكل حبايبك ..

وعلى فكرة بأدعوكي برضه وكل محبيكي

لقراءةموضوع "قيمنا الجميلة"--وكمان موضوع "ومضات روح "...

وزورونا تجدوا مايسركم ..وفي انتظار تعليقاتكم المميزة..

عنوان القلب الأخضراني

http://zeinabsadekragab@.blogspot.com

غير معرف يقول...

شعرت بصدق وطيبه في كلامك... :) بالرغم اني قلما أطيل النظر في القراءة من علي شاشة الكمبيوتر غالبا اطبع واقرأ...ولكن الشفافيه التي لمستها في كلامك جعلتني استأنف القراءة رغما عني...ولكن أعلمي انك لست وحدك....
غريب اني قرأت عندك عنوان مدونه بـ(من أنا؟)...
بتوفيق دائما :)

Tamer Nabil Moussa يقول...

شرين

هما كلمتين

صوابع ايدك مش زى بعضها

وهكذا تكون البشر

ربنا يوفقك ويكرمك

مع خالص تحياتى

غير معرف يقول...

جيت أسلم عليكى يا شيرى
وحشانى

ربنا يحفظك يارب

eng_semsem يقول...

العيب مش في اللي بيصدق الناس العيب في اللي بيكدب على الناس واما حكايات الاصحاب مش بتنتهي ويرجع كل واحد لذوقه وادبه واخلاقه
تقبلي تحياتي

reemaas يقول...

جيتى على الجرااااااااااااح ياشيرى ده انا شاربة من ده كتير واللى يغيظ بقى انى ولا بتعلم ماعرفش ده اسمه اي ده

mrmr يقول...

هما الناس اللى قلبهم طيب كده بيصدقوا كل حاجه
ودليل على قلبك الطيب انك بتعاملى الناس كما تحبى ان يعاملوكى مش باسلوبهم ومعاملتهم

لكن لازم نتعلم شئ مهم ان لا نصدق كل الاشياء

ربى يسعدك

Unknown يقول...

أم هريرة (lolocat): و عليكم السلام و رحمة الله و بركاته شكراً يولو على كلامك الجميل اللي أخجلني جداً يا ريت الانسان يقدر يتعامل على طبيعته من غير ما الناس تستغله أو تظن انه (عبيط) ما هي الطيبه بقت سذاجه و المعاني الجميله بتتسرسب من ايدينا ربنا يستر.
أشكرك مره تانيه يا لولو و أكيد زيارتك و تعليقك أسعدوني جداً
تحياتي أختي العزيزه
دمت بود و سعاده

Ms Venus يقول...

يااه يا شيرين

فكرتينى بحاجات مش عاوزة افتكرها


اصعب حاجة انك تتوجعى وتتصدمى من ناس عزيزة عليكى

او يتصرفوا بشكل يخليكى تتجمدى كده فى مكانك من الصدمة

بس للاسف لازم نتعامل مع كل المواقف


وردة لقلبك الرقيق حبيبتى

ومبروك العربية صحيح

Unknown يقول...

ELMOSTAFZ:أولاً سعيده جداً انك أول مره تعلق عندي ثانياً بقى عندك حق أصحاب النت بيغطوا مساحه كبيره و مهمه من الصداقه ربنا يديم عليك صحابك و يزيدوا كمان و كمان.
مفيش حد بيتخدع سنين لكن هي مكانتش بتخدعني هي كانت طول سنين صداقتنا معذباني و أنا كنت مستحملاها على أساس ان صاحبك تصاحبه على عيبه و هي ممكن تكون بتحبني لكن للأسف نفسيتها مش صافيه تماماً عشان كده تأثرت من إرتباطي قبلها و باعت صداقتنا لحين متوهمه إني ممكن أرجع تاني.
إظاهر ان أنا اللي طولت شكراً على زيارتك و تعليقك بجد نورتني.
تحياتي لك

Unknown يقول...

ابراهيم رزق: عندك حق يا أستاذ إبراهيم في حاجات كده حساسه أوي متنفعش تبقى إنجليزي مهما كان, بس أنا مش بعامل الناس كملايكه لكن في ناس معينه مبتوقعش منها تصرفات معينه و ده اللي بسببلي صدمه (مؤقته) و يا بخت حضرتك بأصحابك و فعلاً صفه جمبله إن الانسان يقدر يتعامل مع الناس بعيوبهم و يتقبلهم بيها بس المهم مايسوقوش فيها و يضغطوا على أعصابك.
شكراً لرأيك أستاذي العزيز
تحياتي و تقديري لك

Unknown يقول...

فشكووول: و عليكم السلام أستاذ فشكول حمد لله على سلامة حضرتك و سعيده جداً بتعليقك الجميل حضرتك محق في كل كلمه و صدقني ساعات ببقى كده لكن في ناس معينه بيبقى صعب على الانسان يتقبل ندالتهم.
شكراً على الزياره و الاعتراف بالتناقض مش هقول لحد:)
تحياتي لحضرتك

Unknown يقول...

مصطفى سيف: شكراً على ذوقك يا مصطفى و بتفق معاك الصداقه الحقيقيه نادره جداً.
تحياتي و احترامي لك

Unknown يقول...

دعاء العطار :تعريفك للصداقه جميل و بيدل على انك تذوقتيها و عشتي فيها ربنا يديم عليكي النعمه دي للأسف حسن النيه بتسر على إنها سذاجه أو سهوكه و للأسف أنا وقعت مع نماذج كانت قريبه من الصداقه لكن وقت الجد سقطوا في الامتحان.
شكراً يا دودو على تعليقك و دعوتك الجميله.
تحياتي و كل الود لكي

Unknown يقول...

Tears: ميرسي على ذوقك و الله بنحاول ندقق و نتعلم.
نورتي و تحياتي لكي

Unknown يقول...

FAW: شكراً يا مصطفى بجد ده من ذوقك و للأسف الحساسيه زياده أو توقع تصرفات معينه من الناس اللي بنحبهم بيبقى مشكله.
أنا عارفه ان في أعراف بين الولاد و موضوع البنزين و السفر بس بردو بيبقوا أجدع من البنات على الأقل مبيبقاش في غيره و كمان البنات بيبقوا حساسين بطبعهم يعني مينفعش نتعامل مع بعض زي الصحاب الولاد أو نشتم مثلاً...زي (بعض) الولاد:)
الله يبارك فيك و السواقه كانت كارثه بالنسبه لي لكن دلوقتي بقت ضروره لا غنى عنها.
اشكرك يا مصطفى و يا رب دائماً منورني
تحياتي الخالصه لك

Unknown يقول...

ماجد القاضي: وعليكم السلام أستاذ ماجد بعض الفضفضه تحتاج الرأي و وجهات النظر المتعدده و بالتأكيد رؤية حضرتك و مبادئك أفادتني جداً أنا فعلاً كنت أقصد معظم الولاد يتصفوا بالجدعنه بعكس البنات و ده لاحظته و أكدهولي الكثير و لم أكن أقصد إظاهرهم في صورة الوحش و أني أنا الحلو هو مجرد إختلاف في المذاهب الذوقيه و الانسانيه لكن هما كأشخاص محترمين و ده لا يقلل منهم في شئ لكن عند حضرتك كل الحق أننا يجب أن ترك مساحه للضعف الانساني.
شكراً على الكلمات القيمه و التعليق الرائع كالعاده.
كل التحيه و الاحترام لك

ندا منير يقول...

صدقينى انا مش مستغربة ابدا من اللى بتحكيه

لانى حسيت ان انا اللى بتكلم مش انتى

ونفس اللى بتحكيه مرييييييت بيه فى قصص كتيرة قوى

عايزة اقولك متستغربيش ابدااااا هى دى الحياة وعمرك ما هتعاملى الناس كويس والكل هيردلك نفس المعاملة

اهم حاجة تفضلى برده تتعاملى كويس مع كل الناس عشان دى حاجة بينك وبين ربنا

واهم حاجة متصدقيش اى حد ومتثقيش فى اى حد

واتمنالك كل توفيق ونجاح دايما وربنا يعوضك باذن الله

Unknown يقول...

سندباد: عند حق للأسف حسن النيه الآن يعتبر درباً من السذاجه أشكرك سندباد على تعليقك المميز دائماً و الحديث الشريف جاء في مكانه تماماً أشكرك على تذكرتي به.
تحياتي الخالصه لك

Unknown يقول...

rack-yourminds: أشكرك على الدعوه الجميله و لو أني لم أعد أثق في الصدقات القويه.
أول زياره نورت المدونه شكراً على التعليق الجميل.
تحياتي و احترامي لك

Unknown يقول...

ريــــمــــاس: ريماس الرقيقه العذبه للأسف إكتشفت أنه لن يمسح دموعك الا يدك كما يقولون للأسف في زمن طغت فيه المصالح على العلاقات الانسانيه.
أشكرك على كلماتك و صدقك جعلني أفخر بأنك صديقة لمدونتي المتواضعه أشعر أنك من القلائل اللاتي يقدهن الاحاسيس و المشاعر أتمنى أن تظلي على صفاءك و طيبتك.
اسعدتني زيارتك جداً و جعلتني أحمد الله على معرفة قلوب رقيقه مثلك.
تحياتي و كل الود أختي العزيزه
دمتي بود و سعاده

Unknown يقول...

zizi: الأم الحنونه الجميله أنا بحبك أكتر :)
بجد مش مصدقه ان لسه في قلوب جميله و حساسه كده أنا تشرفت بمعرفتك و ماستهلش دموعك بجد خليتيني أزعل اني خليتك تبكي.
أنا كمان كتير ممكن أفكر ماأحكيش لمامتي عن أي مشكله حصلت بسبب تصديقي للناس لكن غصبن عني بحكيلها عشان تفضل تأنبني مع انها أسذج مني بكتيير:)
أنا آسفه اني اتأخرت في الرد عليكي و زيارة مدونتك لكن طبعاً ده شرف لي و ان شاء الله متابعه لحضرتك دائماً.
تحياتي و تقديري و حبي لكي

Unknown يقول...

عابر سبيل: شرفتني بالزياره الأولى و سعيده بأنك لمست ما يجعلك تكمل التدوينه للنهايه أعلم أن كل منا له حكاياته الخاصه عن مشاعر مزيفه أو صداقه كاذبه قد تأثر به مدى الحياه.
سعيده بالزياره و نورتني.
تحياتي لك

Unknown يقول...

Tamer Nabil Moussa: عندك كل الحق لكن المهم أن نتعلم من غير مانقع في نفس الألم تاني.
تحياتي ليك
منورني دائماً

Unknown يقول...

الحــب الجميـــل: انت وحشاني أكتر ربنا يخليكي و تنوريني دائماً.
:)

Unknown يقول...

eng_semsem:أسامه كلامك صحيح و خلاصة ممتازه للموضوع.
تحياتي ليك
نورتني

Unknown يقول...

reemaas: مش عارفه ليه يا نور كنت حاسه ان انتي كمان شاربه من ده:)
تقريباً كده اسمها طيبه و الله أعلم
تحياتي ليكي يا جميل

Unknown يقول...

mrmr: مرمر وحشتيني و نورتيني يا قمر فعلاً أنا بنتظر من الناس تعاملني زي ما أنا كنت هعاملهم لو في نفس الموقف.
ربنا يسعدنا جميعاً شكراً على التعليق الجميل.
تحياتي و كل الود لكي

Unknown يقول...

Ms Venus: الله يبارك فيكي يا جميل مكنتش قاصده اني أقلب المواجع كده معلش يا فينوس ده أكيد من طيبة قلبك و رقتك و عموماً لسه في ناس تستاهل نصدقها.
نورتيني
تحياتي و ورده جميله لأجمل فينوس

Unknown يقول...

ندا منير: شكراً يا ندى كلامك مريح و واضح اني مش لوحدي تقريباً مفيش حد غير و مر بنفس التجربه أو ما شابه بس زي ما قلتي أهم حاجه نستمر على مبدأنا في المعامله مع شوية محاولات للتدقيق في إختيار الأصدقاء و تصديق الحقيقي بس.
شكراً يا جميل على التعليق الجميل اللي فادني كتير و ربنا يتقبل دعاءك.
تحياتي الخالصه لكي

ياسمين يقول...

بصراحة أنا أيضا ساعات كثيرة بصدق ,ولكن الإنسان لا يتعلم بسهولة ولا بلاش كما يقول أبي العزيز.مفروض نتعلم من تجاربنا ومش ندي للناس ثقة هم مش قدها.
ربنا يسعدك ..لانك كويسة

نيللي علي يقول...

انا ريحت نفسى من زمان ومبقتش اثق غير فى امى واختى وزوجى وبس
البوست رائع

sony2000 يقول...

هههههههههههههههههههههههههه

بجد افتكرتيني بنتها:)

هي امي زي امي بجد
وبحبها جدا جدا

ربنا يخلينا كلنا لبعض يارب