الثلاثاء، 14 مايو 2013

معاك سعادة فكّه؟





عايز تكون سعيد؟

كلنا بندوّر على السعاده بنتلمسها زي الأعمى اللي بيتلمس النور, و نفضل نقرى في تعريفات عنها زي إن السعاده هي الرضا, و السعاده هي النجاح, و السعاده هي الأمان, و السعاده هي الحُب, لكن في الواقع إحنا تعساء عشان بنعلّق سعادتنا على أشخاص و أحلام بعينها و لمّا الأمور مابتكونش قد التوقعات كالعاده..بنفشل إننا نكون سعداء.

لمّا بنحاول نسمع للتعريفات و الأقاويل و الإعتقادات عن السعاده بنكتأب أكتر, لأن كل التعريفات دي خطط طويلة المدى للسعاده, بنسعى لها لكن خلال سعينا بنحتاج سعاده فكّه نقضي بيها أيامنا, سعاده شبه بؤ الماية الساقع و إنت طالعان عينك في مشوار حكومي الصبح, سعاده شبه التعبير على وش أمي لمّا بسيب الشغل بدري و أعدي عليها, صوت مفتاحي في الباب, المفاجأة في عنيها و هي حاسه إني راجعه من الكلية أو المدرسة, و تسألني "فين الولاد؟" و أنا سامعه قلبها بيقول "كويس إنك جيتي لوحدك", سعاده مخطوفه زي سعادتي لمّا بآكل أيس كريم لوحدي في العربية و أنا بسمع أغنيّة بحبها, سعادة زي سعادتي و أنا مخطوفه في رواية جذابه مسيطره على كل خيالي, سعادة زي سعادتي لمّا بتفرج على فيلم لفاتن حمامه و عمر الشريف, سعاده زي سعادتي و أنا بستعيل و بلعب مونوبلي و أسوق عجل و آكل غزل البنات, زي سعادتي لمّا بنجز أي حاجه عبيطه و أصرخ yes i did it :), سعاده زي سعادتي و أنا بتنطط في العربية لمّا بسمع أغنية الشاب خالد الأخيره, سعاده فكّه زي لمّا تجيلك هدية ماكنتش متوقعها...

بس أجمل و أسهل سعاده فكّه ممكن تحصلك و تستمر معاك مدّه طويله, هي سعادتك لمّا بتعمل حاجه لحد من غير مقابل, لمّا بتعمل عمل خير حتى لو إنت حاسس إن كلك شر :), بتبقى حاسس و لو لثواني إنك ملاك بيرفرف و إنك أسعد من اللي أسعدته و بيكون عندك حماس إنّك تبدأ حاجات كتير كنت مأجلها, و حتى لو مبدأتهاش كفاية إنك تحس بفاصل من السعاده, ممكن تفتح دولابك إنهارده و تطلع القميص اللي ضاق عليك, و البنطالون المركون ده بقاله سنتين, ممكن تطلعي البلوزه اللي مباقتيش تلبسيها عشان راحت موضِتها و الشنطة اللي قدمت, طب ممكن تصلّحي أي حاجه مقطوعه عندك كنت ناويه تعمليها حتّة تنضيف, و تنضفي الجزم اللي أكلها التراب و مبتتلبسش, ممكن نجمع أي حاجه مش محتاجينها مع إنها بتمثل كنز لغيرنا, و نصنع لنفسنا سعاده حقيقيه و لو بسيطه, سعاده الإستغناء و سعاده العطاء.

مستنياك تشاركنا في صنع السعاده و تجيب معاك بؤجتك حتى لو صغيره يوم الجمعة 24 مايو الساعه 11 الصبح, هنـــا إيفنت بؤجة الخير السنوي اللي بتعمله المدوّنه داليا قوس قزح و المكان 20 شارع احمد خيرى بجوار محطة مترو الانفاق الزهراء فوق كافتيريا السرايا - الزهراء القديمة

و إوعى حد يسألني عن العنوان عشان أنا أحسن واحده تتوه :)

عمر طاهر..كتير بيفرق معايا



هناك 9 تعليقات:

ابراهيم رزق يقول...

كرباج سعـــادة وقلبي منه انجلد.
رمح كأنه حصـــان ولف البلد.
ورجع لي آخـــر الليل وقاللي
ليه مكسوف تقول إنك سعيد يا ولد
.... عجبي.

للسعادة تعريفات كثيرة
لكن انا السعادة بالنسبة لى لحظات الصعلكة و الطفولة
اللحظات اللى برجع و بحاول فيها ابقى طفل
و السعادة فى عيون الاخرين
هحكيلك حكاية سريعة
فاتيما لما بيجيها طفل من اطفال الشوارع بتديله مصاصة
مش قادر اقولك قد ايه بيبقى سعيد و بيبتسم او تبتسم
مع ان المصاصة ممكن تكون تمنها اقل من الفلوس لكن بتديهم سعادة
مجرد الشعور انها هدية مش حسنة

اما البؤجة فربنا يقدر الجميع على فعل الخير

تحياتى

Mostafa gazar يقول...

السعادة هي حالة عميقة من حالات السكينة تقل فيها الحاجة إلى الكلام وتنعدم الرغبة في الثرثرة. هي حالة رؤية داخلية مبهجة واحساس بالصلح مع النفس والدنيا والله، واقتناع عميق بالعدالة الكامنة في الوجود كله، وقبول لجميع الآلام في رضى وابتسام....
كلمات د مصطفى محمود ...
تدوينه رائعه ...وربنا يسعد الجميع
.................................
فكرة عمر طاهر جميله جداااااااااا والفيديو ملوش حل :)

الازهرى يقول...

أحلى حاجة
تكتبوا بوستات زى العسل
لكن نيجى يومها
ولا نلاقى حد منكم

مصطفى سيف الدين يقول...

ان مكنتش قادر تبتسم فارسم بسمة على وش اي انسان هتغسل قلبك من هموم كتير
كنت اتمنى اكون معاكم يومها
لكن ان مجتمعناش كأجساد هنجتمع كارواح و أشارككم من هنا
ربنا يقدركم على فعل الخير
و يبارك فيكم

eng_semsem يقول...

تسلم ايديكي يا دكتوره ويارب نكون دايما سبب في سعادة اللي حوالينا
تحياتي

رؤى عليوة يقول...

بجد تسلم ايدك

عجبنى البوست اوى من اوله لآخره
لكل عمر ولكل مرحله تعريف للسعاده مختلف
ببساطة طول الوقت بندور عن اسباب السعاده فيه ناس عارفه هى بتدور على ايه بالظبط
وفيه ناس تايهه بتدور وخلاص ودى الكارثة


عن البؤجة يارتنى بجد اكون معاكوا
كتير بتخنق انى اكون عايزة اشارك فى حاجة وتقف المسافه عقبة

ربنا معاكوا


دمت بخير

momken يقول...

.......

برغم انى بفرق جدا بين عمل الخير ومنح السعاده
فعمل الخير -اﻵنفاق - يكون لغير القادر
اما منح السعاده فيكون للجميع القادر والفقير ..القريب والغريب ...الكبير والصغير
ومع ذلك استمتعت جدا بمقدمه البوست الرائعه
تحيانى

......

reemaas يقول...

عجبنى العنوان اوى اوى اوى

انا السعادة عندى فى لحظة لمة مع الاصحاب او فى مفجأة حلوة ولو بسيطة تحصلى

P A S H A يقول...

البؤجة جت يا ولاد :))))

الواحد يفضل مستني اليوم ده من السنة للسنة ؛ وفي الآخر ما بيلاقيش حاجة على مقاسه D:

بصوا .. علشان الإحراج .. ممكن كل واحد يدفع خمسة جنية وتحطوهم في ظرف وأنا هاعمل نفسي مش واخد بالي D:

ربنا يا رب يا رب يقدركوا دايماً على فعل الخير ويجعل هذا العمل في ميزان حسناتكم جميعاً اللهم آمين

سلامنا لكل الناس الحلوة