الجمعة، 17 ديسمبر 2010

ب فتحه ب بَحبك





بنُاءً على دعوة الأستاذ ماجد القاضي صاحب مدونة هكذا عاملتني الحياه للمدونين لكتابة بوست عن أي حاجه بنحبها كدعوه للتفاؤل و ادخال البهجه على النفوس, و بصراحه بما ان كل من يعرفني يعتبرني ماده خام للتفاؤل لذا قررت أستجيب للدعوه و أكتب عن كل حاجه بحبها.

في ثوابت أحب أبدأ بيها أولاً حب ربي و نبيي و ديني اللي دائماً بحس بالتقصير من ناحيتهم و بخجل من ذكر حبهم لأني مقدمتش حاجه قصاد النعم الكتير اللي عندي و حبي لهم لا يقارن بشئ , حب أهلي اللي لولاهم مكانش بقى لي وجود ,حب زوجي اللي لا شئ يغنيني عنه, حب أولادي اللي هما امتداد لروحي, حب بلدي اللي بتنـزف كل يوم و أنا مكتوفة الأيدي لا أملك الا إني أعشق كل تفاصيلها, أي حب بعد كده ممكن يبقى متغير حسب الزمان و المكان لكن دول حبي ليهم مبيتغيرش أبداً.

بحب البدايات جداً يعني بداية كل شئ , بداية اليوم الصبح بدري بيبقى أفضل وقت عندي بتتملكني فيه سعاده و تفاؤل مالهوش سبب لدرجة ان جوزي بيستغربني جداً و يقولي (في حد يقعد يغني عالصبح) , بداية السنه الجديده بداية الشتاء بداية الربيع و الصيف بداية السنه الدراسيه هم أسعد أوقاتي يمكن عشان أي بداية بتحمل أمل و أنا بتلكك عشان يبقى عندي أمل في كل حاجه.

بحب رمضان و العيد الصغير بستناهم من أول ما بيخلصوا و مهما كان بحافظ على سعادتي في الفتره دي لأسباب كتير.

بحب المفاجآت السعيده طبعاً يعني أي حاجه حلوه بتيجي على غفله من غير تخطيط أو معرفه مني بتسعدني جداً مبحبش حد يديني فلوس و يقولي هاتي هديه مثلاً, عنصر المفجأه بيفضل لي ذكرى جميله طول العمر مبتروحش.


بحب أقعد مع نفسي شوية حتى لو ساعه في اليوم مفكرش في أي حاجه و ميبقاش ورايا حاجه أقعد كده و خلاص أدي مخي أجازه و للأسف دي حاجه نادره أوي.

بحب وجودي وسط بابايا و مامتي و اخواتي و احضنهم كلهم مره واحده مش عارفه ازاي.

بحب أقرى روايات و قصص قصيره لكتاب مختلفين بحب التنوع و بحب أكتب أوي بقلم رصاص على ورق أبيض.

بحب صوت عمرو دياب زمان و محمد منير و هشام عباس و مصطفى قمر بيرجعني 15 سنه ورا.

بحب الورد بكل أشكاله و ألوانه بالذات الورد البلدي الأحمر.

بحب أشتري حاجات حلوه مع ابني و بعشق حاجه اسمها أيس كريم بكل أنواعه خصوصاً في الشتا.

بحب أحتفل بأي حاجه و أي مناسبه حتي لو بمناسبة أول مره عملت فيها محشي مثلاً.

بحب أقعد على البحر بالنهار و أشم ريحته المنعشه و أملى عيني من الموج مبتحصلش غير فين و فين.


بحب أشتري لبس:)


و أخيراً بحب الناس الرايقه اللي بتضحك على طول أما العالم المتضايقه أنا لأ ماليش في دول و ماليش في الدمع لا لا و لا في الناس الشياله كل اللي فقلبه حاجه أول بأول يقول....يلا قولوا بقى:))






هناك 66 تعليقًا:

Dr/ walaa salah يقول...

جميله الحاجات اللي بتحبيها

رقيقه اوي

بس نسيتي تقولي انك بتحبي اللون الاحمر صح يا شيري ^-^

ربنا يديم عليكي محبة الناس

ويفضل الحب مالي دنيتك

Tamer Moghazy يقول...

مممممممم...
شكلك بتحبي كلللل حاجة :)
بس اكتر حاجة عجبتني (بدايات الاشياء)
ربنا يديم عليك نعمة الحب المطلق لكل شيء :)

Casper يقول...

التفاؤل شئ جميل بالتأكيد من شأنه خلق كيان من السعادة في الحياة

======

ادام الله عليكِ التفاؤل

خالص تقديري واحترامي

Carmen يقول...

ربنا يديكي كل الحاجات اللي بتحبيها ع طول عشان انت تستاهلي كل خير
تسلم ايدك ياحبي

غير معرف يقول...

طبعا إحنا بنحب كلامك الجميل و بنحب ننتظر البوستات المميزة اللي بتكتبيها

Mona Hekal يقول...

انا كل يوم بحبك اكتر
و زيادة في حبي ليكي علشان اعرفك اكتر هاحدفك انا كمان بتاج بس لما انشر بتاعي
صباح التفاؤل

شهر زاد يقول...

شرين
يا طيبة يا لي فتحه
قلبها
للناس كلها
خليك زي ماانت
اوعي تضعفي
ولا تغيري
الحياة حلوة بيك
وبضحكتك حتخليني
احبك وتحبيني
تحياتي

ستيتة يقول...

الله الله الله
قلب ابيض يا جدعان
بحب فيكي احتفاظك ببراءة الطفولة دون غيرها
فاهمة وواعية وعارفة بس محافظة على عادات بريئة صغيرة جميلة ربنا يحفظ عليكي نعمه

سواح في ملك اللــــــــــــــــــه- يقول...

المتفائلة
شيرين
مااجمل التفاؤل ثوابتك جميلة
وطباعك واخلاقك اجمل
بارك الله لكي في عائلتك وبارك لهما فيكي
تحيتي الطيبة لاختي المتفائلة

reemaas يقول...

بسيطة وجميله الحاجات اللى بتحبيها ياشيرى اوى
ربنا يحلى ايامك

عباس ابن فرناس يقول...

مش مهم بنحب ايه الاهم ان يكون عندنا القدرة على الحب
ودى نعمة من الله سبحانه وتعالى

ربنا يديمها عليكى ياشرين

هبة فاروق يقول...

ههههههههههه عسولة يا شيرين يا رايق انت يا جميل
انا بحب الايس كريم زيك وخاصا فى شهور الشتاء
وبحب البحر واعشق السباحة فى اشياء مشتركة بينا
لما قريت البوست حسيت انى انا اللى كتبتة
مشكورى يا شيرى يا قمر

سندباد يقول...

ربنا يديم عليكي التفاؤل ويحققلك كل ما تتميه بوست جميل وشكرا انك عرفتينا علي جانب من شخصيتك
تقديري واحترامي

Tamer Nabil Moussa يقول...

ربنايسعدك كمان وكمان


مع كل حاجة بتحبيها او تتمنى تعمليها


مع خالص تحياتى

وداد يقول...

ربنا يحبب فيكي خلقه

مش عارفة الدعوة دي جات لي وانا بكتب لك الرد

هههههههههه

بس بجد انتي شخصية جميلة جدا وكتير رقيقة وشفافة

انا زيك بالضبط بالضبط في حبك للبدايات

انا كمان بحب اول اول النهار واول الاسبوع وأول السنة الدراسية واول الربيع وأول ........

بدور على أي حاجة هتبدأ

تصدقي كمان بحب اوي لما اكون بتفرج على حاجة في التليفزيون بحب اشوفها من الاول

حتى لو كنت شوفتها قبل كده

اسفة على الرغي

بس بوست جميل جدا

Unknown يقول...

Dr/ walaa salah:نسيت موضوع الأحمر فعلاً بس خلاص الورده حمرا:)
شكراً يا حبيبتي لذوقك نورتيني

Unknown يقول...

Timo: لا ده في حاجات كتيييير مبحبهاش بس الأجمل بجد زيارتك شكراً ليك و نورتني

Unknown يقول...

Casper: عندك حق التفاؤل هو الي بيعمل جو السعاده لكن مهم اللي حواليك ميطفوش شعلة التفاؤل دي
شكراً على تعليقك الجميل تحياتي ليك

Unknown يقول...

karmen: شكراً على الدعوه الرقيقه و تسلميلي يا قمر نورتيني

Unknown يقول...

يوميات شحات: دي شهاده من كاتب مُميز زيك أعتز بيها تحياتي ليك

افروديت يقول...

وأنا حبيتك اوي ياشيري بجد

واضح أنك طيبه وجميله ..ربنايسعدقلبك ويملاحياتك بالفرحه

أحلي كلام بجد قولتيه

Unknown يقول...

Mona Abo - Elso3od: و أنا كمان بحبك يا أرق منى و تاجك سيف على رقبتي عُلم و هيُنفذ
مساء السعاده

Unknown يقول...

شهر زاد: أنا مش قد الكلام الحلو ده ربنا يخليكي و شكراً على كلماتك الرائعه
أسعدتيني جداً
تحياتي الشديده لكي

جميله المصرى يقول...

السلام عليكم

والله ياشرين انا زيك فى حاجات كتير بردو واهمها اكل الايس كريم فى الشتا وشرب القهوه الفجر

وافتح البلكونه الصبح بدرى
وصلاه العيد وسماع التكبيرات

ربنا يوفقك يارب

ويديم عليكم رضاه

بالتوفيق دائما لحياه كلها امل وحب وسعاده

اختك جميله

admelmasry يقول...

قمة التفاؤل
اللهم زيدك وارزقنا مما اعطاكي

Mostafa gazar يقول...

ربنا يخلى أيامك حب وسعاده وتفاءل و مرح وصحه وراحةبال.....و ربنا يديم عليك الشمل الجميل ويبارك لك فى زوجك وامن وجورى...و يديم الصحه على والديك..و أسعدك الله دائما كما تسعدينا بكتاباتك الرائعه المشرقه...تقبل تحياتى واحترامى
.....................و فى أمان الله

جايدا العزيزي يقول...

و أخيراً بحب الناس الرايقه اللي بتضحك على طول أما العالم المتضايقه أنا لأ ماليش في دول و ماليش في الدمع لا لا و لا في الناس الشياله كل اللي فقلبه حاجه أول بأول يقول....يلا قولوا بقى:))

وانا كمان وبحب المطر والايس كريم فى الشتا

يعنى بصرة ياقمر

يا ارق واغلى وطيب قلب فسر للعالم معنى الحب

ربنا يخليلك ابنك

ويحققك ليك كل ما تحبيه

ممكن طلب

ممكن ممكن

عايزة اعرف انزل الميوزك ده على مدونة زوجى

ممكن تعليمينى ازاى

منتظراك بس بالتفصيل

تحياتى

حرّة من البلاد..! يقول...

شيرين الغالية
احببت تفاؤلك جدا والأمل دائما نحن نصنعه بيدينا
انت جميلة
احببتك في الله
تحياتي يا رقيقة

Mona space يقول...

وانا كمان بحب المطر والايس كريم مع بعض :)
بحس انهم بيلهونى عن كآبه الشتاء شويه :(
ادام الله عليكى السعاده يارب :)

Wise يقول...

ربنا يديم عليكى كل الحاجات اللى بتسعدك وبتحبيها
دمتى بكل خير

غير معرف يقول...

ربنا يسعد ايامك
ودايما متفأله كدا يارب
ويخليلك ابنك و بابا وماما وزوجك وكل حبايبك

Unknown يقول...

ستيتة حسب الله الحمش: ربنا يخليكي يا دكتوره و مع ان العادات الطفوليه دي ناس بتشوفها جميله و بتبعث على السعاده ناس تانيه بتشوفها روقان مُضر بالواقع
تحياتي الشديده لحضرتك

Unknown يقول...

سواح في ملك الله: شكراً يا أخي العزيز و بيسعدني كتير تعليقك بشكرك مره تانيه على الدعاء
تحياتي الخالصه لك

Unknown يقول...

reemaas: شكراً يا جميله ربنا يسعدنا جميعاً:)

Unknown يقول...

عباس ابن فرناس:مش مهم بنحب ايه الاهم ان يكون عندنا القدرة على الحب
كلماتك حكمه رائعه و حقيقه
شكراً على تعليقك الجميل

Unknown يقول...

هبة فاروق: يشرفني اننا مشتركين في حاجات كتير بس أنا مبعرفش أعوم:( بغرق في شبر ميه
شكراً يا قمر نورتيني بتعليقك

Unknown يقول...

سندباد: أشكرك على دعواتك الجميله و أسعدتني زيارتك و تعليقك
تحياتي الخالصه لك

Unknown يقول...

Tamer Nabil: بشكرك على الأماني الجميله
احترامي و تقديري لك نورتني

Unknown يقول...

وداد:مفيش أسف و لاحاجه أنا بحب التعليقات الطويله سعيده اننا مشتركين في حاجات كتير أنا صحيح بحب بدايات الأشياء ماعدا الأسبوع ده الوحيد اللي بحب نهايته هههه
شكراً على تعليقك الجميل و في انتظار البوست بتاعك
تحياتي الخالصه ليكي

المصوراتي يقول...

السلام عليكم

مدونتك رائعه

و واضح انك بتحبي الحياه و كل ما هو حلو بها

تحياتي

Unknown يقول...

افروديت: ميرسي يا أفروديت الجميله زيارتك و تعليقك هما أجمل حاجه في البوست
دمتي بسعاده

Unknown يقول...

جميله المصرى: أختي الجميله سعيده بتعليقك و أنا فعلاً بحب كل الحاجات اللي قولتي عليها ما عدا القهوه بتعملي هبوطس حادس ههههه
نورتيني تحياتي الخالصه لكي

Unknown يقول...

ادم المصري: شكراً على التعليق الجميل أسعدتني بزيارتك

Unknown يقول...

mostafa gazar: تليقك دائماً بستناه و بيسعدني شكراً على أمانيك و دعواتك الجميله و ربنا يسعدنا و اياك و أفضل دائماً عند حسن طنك
تحياتي الخالصه لكي

Unknown يقول...

جايدا العزيزي: جايدا الغاليه مش قادره أقولك قد ايه بتبسطني تعليقاتك و أسعدتيني جداً بكلماتك الرقيقه
أنا آسفه بجد يا دودو أنا مش عارفه ازاي أحط ميوزيك على المدونه بس هقولك مين ممكن يساعدك منى أبو السعود صاحبة مدونة تخاريف عقل و قلب
http://3aklwqalb.blogspot.com/
لأنها حاطه ميوزك عندها لكن أنا ضعيفه شويه تكنولوجياً:)
تحياتي ليكي يا قمر و آسفه مره تانيه

Unknown يقول...

حرّة من البلاد..!: أحبك الذي أحببتني فيه القلوب عند بعضها ربنا يسعد قلبك يا حبيبتي
تحياتي الخالصه لكي

Tears يقول...

و انا بحب خفة دمك و روقانك دول :))


دمتى بحب و تفاؤل

Unknown يقول...

شخابيط: يا سلام مفيش أجمل من كده
شكراً على التعليق الجميل و نورتيني:)

Unknown يقول...

Wise:ربنا يخليك و تعليقك أسعدني كتير
تحياتي الخالصه

Unknown يقول...

الحب الجميل: شكراً يا حبيبتي و ربنا يسعدك و يرضيكي
تحيه طيبه لكي

Unknown يقول...

المصوراتي: الحمد لله بحاول
نورتني بالزياره و شرفتني بالمتابعه
تحياتي لك

الحسينى يقول...

حب البدايات الجديدة نابع من شخصيتك المتفائلة وبرغم أنك ذكرت ذلك إلا أنه واضح للغاية من كتاباتك أنك شخص متفائل والأشخاص المتفائلين يقعون عادة فى غرام كل الأشياء البسيطه مثل كوب من الأيس كريم أو هدية أو منظر طبيعى "مثل البحر"
دمتى متفائلة :)

eng_semsem يقول...

انت بتحبي حياتك وربنا يملاها خير وحب ويهنيكي ويسعدك ويحقق امنياكي وتشوف اولادك بيكبروا قدامك وتعملي كل اللي نفسك فيه
تقبلي تحياتي

غير معرف يقول...

أدام الله سعادتك باستمرار :)

تخاريف مترجــِــمة يقول...

كالعادة مبدعه يا شيرين

ربنا يكرمك وتدوم سعادتك وأملك وتفاؤلك

Unknown يقول...

السلام عليكم

رغم قراءتي الموضوع من بداية نزوله، لكن معلش تعليقي جاي متأخر...

صدقا أختي شيرين... أنا عندما طرحت الفكرة لم أكن أتوقع أن تأتي المواضيع بمثل هذا الجمال..
حقيقي الموضوع مليء بالتفاؤل والبشر..
وبه أشياء جميلة جدا (الواحد ممكن ينتبه إليها بعد كده) :)

خاصة موضوع البدايات..

وموضوع القلم الكتابة بالرصاص على الورق الأبيض .. حسيته جدا.. لأني كنت بحبه جدا برضه.. أيام ما قبل الكيبورد كنت باكتب كل رواياتي بالرصاص ولا أحب الكتابة بالجاف أو الحبر :)

تحياتي وشكري الجزيل على تلبية الدعوة...

r يقول...

السلام عليكم
عجبتنى اوى حاجاتك اللى بتحبيها
واشاركك حب الايس كريم فى الشتاء
وقرايه الروايات طبعا
وكل البدايات بحبها جدا بس بمجرد بداياتها مودى بيتغير
البوست دا فيه جرعه تفاؤل جميله
ابهجتنى الصراحه
كل التحيه

Unknown يقول...

الحسينى: تحليل رائع و صحيح شكراً على زيارتك الدائمه و تعليقاتك الجميله
تحياتي لك

Unknown يقول...

eng_semsem: بشكرك على أمانيك و دعواتك الجميله ربنا يسعدك
تحياتي الخالصه

Unknown يقول...

أحمد شريف: شكراً جزيلاً نورتني بالزياره

Unknown يقول...

تخاريف مترجــِــمة: سعيده أكتر بزيارتك و شكراً على الدعوات الجميله
تحياتي الخالصه

Unknown يقول...

ماجد القاضي: و عليكم السلام و رحمة الله و بركاته
الشكر لحضرتك على دعوتك اللي كلها تفاؤل و سعيده اننا تشابهنا في حب الكتابه بالقلم الرصاص
تحياتي الخالصه لحضرتك و شرفتني بالمتابعه

Unknown يقول...

بسنت:و عليكم السلام و رحمة الله و بركاته
نورتيني بالزياره و تعليقك الجميل هو اللي أدخل على البهجه
سعيده جداً ان البوست عجبك و في انتظار زيارتك دائماً

Unknown يقول...

Tears: ميرسي يا جميل نورتيني بالزياره:)

الهقلص يقول...

يجب أن يسجل هذا تحت مسمى رائعة القناعه فالقناعة كنز لا يفنى وانتي إنسانة مرهفة ومتذوقه للحياة ومفهومك جميل له أثر إيجابي في نمط حياتك بشكل عام وقد شاطرتك بين الأسطر تأمل الحياة وسكونها وجمالها حتى أحسست أني وحيد في هذه الدنيا وحيد بين طبيعتها الخلابة فشكرا ......وشكرا لمن أدخلني بين جنة هذه المدونة atook

الهقلص يقول...

يجب أن يسجل هذا تحت مسمى رائعة القناعه فالقناعة كنز لا يفنى وانتي إنسانة مرهفة ومتذوقه للحياة ومفهومك جميل له أثر إيجابي في نمط حياتك بشكل عام وقد شاطرتك بين الأسطر تأمل الحياة وسكونها وجمالها حتى أحسست أني وحيد في هذه الدنيا وحيد بين طبيعتها الخلابة فشكرا ......وشكرا لمن أدخلني بين جنة هذه المدونة atook