صديقات...و لكن!

مشكلتي اني بصدق كل حاجه و أي حد أو هكذا كنت, متضحكوش لو قلت اني كنت فاكره (سوني) بنت الدكتوره (ستيته حسب الله الحمش) بجد, و إني ساعات كنت بفتكر ان الصور اللي بيحطها الناس على الفيس بوك صورهم بجد, صدقت إن بعض البنات صديقات, و المشكله دي خلتني أتخدع كتير في الناس , مكرهتش حد لأنها مشكلتي أنا اني بصدق.

مكنتش عايزه اتكلم في مدونتي عن أي موضوع شخصي لكن الفضفضه مهمه أحياناً, في مواقف بتعدي في حياة الانسان مبينسهاش مع إنها صغيره لكن عميقه , احدى المواقف دي من صديقة عمري اللي كانت بمثابة أختي و لما ارتبطت بزوجي قطعت علاقتها بي بشكل مفاجئ و غير مبرر , صدمتني, اتجوزت بسرعه قبل فرحي بأيام و معزمتنيش, بكيت كتير علاقتنا اللي كانت قويه اتمنيت تشاركني إختيار فستان الفرح و أتمنيت أكون جنبها في فرحها كان نفسي اشوفها و هي بتلبس الطرحه و كان نفسي تحضني بحب في فرحي.

بابايا كان دائماً يقولي البنت دي هتقطع علاقتها بيكي لما ترتبطي و رغم إني بصدق كل حاجه بس المره دي مصدقتوش, كان شايف إنها عايزه تستحوز عليه و متخليش ليه صحاب و فعلاً هي بعدتني عن كل زميلاتنا الا واحده مخلصه لولاها كنت مصدقتش ان في حاجه إسمها صداقه, الغريب إنها حاولت تاني ترجع علاقتنا بكل قوتها و سامحتها لكن مقدرتش أرجع معاها زي الأول.

الموقف التاني من زميله في العمل كنت مصدقه إنها صديقه لما كنا بنخرج مع بعض و ناكل مع بعض و نشارك هموم بعض, لحد ما بدأت تسوق و كانت بتوصلني في طريقها لأننا جيران, إشتكت مرات قدامي من غلو البنزين...منتبهتش, إتفقت هي و بنات زميلاتنا إنهم يركبوا مع بعض كل يوم بعربيه و لأني كنت من نفس الحي أركب معاهم....صحيح البنات للأسف مش في نفس شهامة الرجال كانوا بينزلوني في طريقهم كتر خيرهم لكن محدش فكر يتعب شويه لمدة دقائق عشان أنزل عند بيتي بدل ما أضطر تاني أركب تاكسي , في حين الولد ممكن يوصل صاحبه المطار عادي جداً و بكل حب...المهم صاحبتنا دي إقترحت إقتراح ظريف إني أركب معاهم بشرط أدفع ثمن الجراج...!

يمكن يكون موقف عادي في نظر البعض لكن بالنسبه لي كان و مازال جرح لأني تعودت أعامل الناس بطريقه معينه و كنت بنتظر منهم نفس الطريقه و عمري ما تخيلت إن الفلوس هتكون شرط لعودتي معاهم, كام جنيه!! أهم من علاقات إنسانيه , طبعاً ساعتها إختفيت ساعة الخروج من العمل كنت بتبخر و مكانش حد يشوفني و لا كنت عايزه أشوف حد, الغريب بقى إني لما رجعت الشغل و معايا عربيه المره دي و بسوق البنت دي كلمتني من يومين و طلبت مني تروح معايا الشغل لأن العربيه أصبحت مع زوجها, عايزين تعرفوا عملت إيه.....؟ , أنا مش زيهم لما حد بيركب معايا بينزل عند باب بيته معزز مكرم.

ممكن محدش يستغل الفرصه و يقولي أي حاجه و أصدقها :)